Ahmad Faraz Poetry

Ab shauq se ki jaan se guzar jaana chahiye
ab shauq se ki jaan se guzar jaana chahiye
bol ai hawa-e-shahr kidhar jaana chahiye

kab tak isi ko aaKHiri manzil kahenge hum
ku-e-murad se bhi udhar jaana chahiye

wo waqt aa gaya hai ki sahil ko chhoD kar
gahre samundaron mein utar jaana chahiye

ab raftagan ki baat nahin karwan ki hai
jis samt bhi ho gard-e-safar jaana chahiye

kuchh to subut-e-KHun-e-tamanna kahin mile
hai dil tahi to aankh ko bhar jaana chahiye

ya apni KHwahishon ko muqaddas na jaante
ya KHwahishon ke sath hi mar jaana chahiye

Tod diya tasbi ko is khyaal se Faraz
Kya gin gin ke naam lena uska jo behisaab deta hai
Abhi kuchh aur karishme ghazal ke dekhte hain
abhi kuchh aur karishme ghazal ke dekhte hain
‘faraaz’ ab zara lahja badal ke dekhte hain

judaiyan to muqaddar hain phir bhi jaan-e-safar
kuchh aur dur zara sath chal ke dekhte hain

rah-e-wafa mein harif-e-KHiram koi to ho
so apne aap se aage nikal ke dekhte hain

tu samne hai to phir kyun yaqin nahin aata
ye bar bar jo aankhon ko mal ke dekhte hain

ye kaun log hain maujud teri mahfil mein
jo lalachon se tujhe mujh ko jal ke dekhte hain

ye qurb kya hai ki yak-jaan hue na dur rahe
hazar ek hi qalib mein Dhal ke dekhte hain

na tujh ko mat hui hai na mujh ko mat hui
so ab ke donon hi chaalen badal ke dekhte hain

ye kaun hai sar-e-sahil ki Dubne wale
samundaron ki tahon se uchhal ke dekhte hain

abhi talak to na kundan hue na rakh hue
hum apni aag mein har roz jal ke dekhte hain

bahut dinon se nahin hai kuchh us ki KHair KHabar
chalo ‘faraaz’ ku-e-yar chal ke dekhte hain

Hum se bichad ke us ka takbbur bikhar gaya Faraz
Har ek se mil raha hai badi aajaji ke sath
Agarche zor hawaon ne Dal rakkha hai
agarche zor hawaon ne Dal rakkha hai
magar charagh ne lau ko sambhaal rakkha hai

mohabbaton mein to milna hai ya ujaD jaana
mizaj-e-ishq mein kab e’tidal rakkha hai

hawa mein nashsha hi nashsha faza mein rang hi rang
ye kis ne pairahan apna uchhaal rakkha hai

bhale dinon ka bharosa hi kya rahen na rahen
so main ne rishta-e-gham ko bahaal rakkha hai

hum aise sada-dilon ko wo dost ho ki KHuda
sabhi ne wada-e-farda pe Tal rakkha hai

hisab-e-lutf-e-harifan kiya hai jab to khula
ki doston ne ziyaada KHayal rakkha hai

bhari bahaar mein ek shaKH par khila hai gulab
ki jaise tu ne hatheli pe gal rakkha hai

‘faraaz’ ishq ki duniya to KHub-surat thi
ye kis ne fitna-e-hijr-o-visal rakkha hai

Us shakhs se bas itna sa taalluk hai Faraz
Wo pareshan ho to humein neend nahin aati
Aisa hai ki sab KHwab musalsal nahin hote
aisa hai ki sab KHwab musalsal nahin hote
jo aaj to hote hain magar kal nahin hote

andar ki fazaon ke karishme bhi ajab hain
meinh TuT ke barse bhi to baadal nahin hote

kuchh mushkilen aisi hain ki aasan nahin hotin
kuchh aise muamme hain kabhi hal nahin hote

shaistagi-e-gham ke sabab aankhon ke sahra
namnak to ho jate hain jal-thal nahin hote

kaise hi talatum hon magar qulzum-e-jaan mein
kuchh yaad-jazire hain ki ojhal nahin hote

ushshaq ke manind kai ahl-e-hawas bhi
pagal to nazar aate hain pagal nahin hote

sab KHwahishen puri hon ‘faraaz’ aisa nahin hai
jaise kai ashaar mukammal nahin hote

Barbaad karne ke aur bhi raaste the Faraz
Na jane unhe muhabbat ka hi khyal kyun aaya
Aise chup hain ki ye manzil bhi kaDi ho jaise
aise chup hain ki ye manzil bhi kaDi ho jaise
tera milna bhi judai ki ghaDi ho jaise

apne hi sae se har gam laraz jata hun
raste mein koi diwar khaDi ho jaise

kitne nadan hain tere bhulne wale ki tujhe
yaad karne ke liye umr paDi ho jaise

tere mathe ki shikan pahle bhi dekhi thi magar
ye girah ab ke mere dil mein paDi ho jaise

manzilen dur bhi hain manzilen nazdik bhi hain
apne hi panw mein zanjir paDi ho jaise

aaj dil khol ke roe hain to yun KHush hain ‘faraaz’
chand lamhon ki ye rahat bhi baDi ho jaise

Tu bhi to aaine ki tarah bewafa nikal Faraz
Jo samane aaya usi ka ho gaya
Ajab junun-e-masafat mein ghar se nikla tha
ajab junun-e-masafat mein ghar se nikla tha
KHabar nahin hai ki suraj kidhar se nikla tha

ye kaun phir se unhin raston mein chhoD gaya
abhi abhi to azab-e-safar se nikla tha

ye tir dil mein magar be-sabab nahin utra
koi to harf lab-e-chaaragar se nikla tha

ye ab jo aag bana shahr shahr phaila hai
yahi dhuan mere diwar-o-dar se nikla tha

main raat TuT ke roya to chain se soya
ki dil ka zahr meri chashm-e-tar se nikla tha

ye ab jo sar hain KHamida kulah ki KHatir
ye aib bhi to hum ahl-e-hunar se nikla tha

wo qais ab jise majnun pukarte hain ‘faraaz’
teri tarah koi diwana ghar se nikla tha

Maine aazad kiya apni wafaao se tujhe
Bewafaai ki saza mujhko suna di jaye
Awwal awwal ki dosti hai abhi

awwal awwal ki dosti hai abhi
ek ghazal hai ki ho rahi hai abhi

main bhi shahr-e-wafa mein nau-warid
wo bhi ruk ruk ke chal rahi hai abhi

main bhi aisa kahan ka zud-shanas
wo bhi lagta hai sochti hai abhi

dil ki waraftagi hai apni jagah
phir bhi kuchh ehtiyat si hai abhi

garche pahla sa ijtinab nahin
phir bhi kam kam supurdagi hai abhi

kaisa mausam hai kuchh nahin khulta
bunda-bandi bhi dhup bhi hai abhi

KHud-kalami mein kab ye nashsha tha
jis tarah ru-ba-ru koi hai abhi

qurbaten lakh KHub-surat hon
duriyon mein bhi dilkashi hai abhi

fasl-e-gul mein bahaar pahla gulab
kis ki zulfon mein Tankti hai abhi

muddaten ho gain ‘faraaz’ magar
wo jo diwangi ki thi hai abhi

Itani si baat pe dil ki dhadkan ruk gai Faraz
Ek pal jo tasvvur kiya tere bina jeene ka
BaiThe the log pahlu-ba-pahlu piye hue
baiThe the log pahlu-ba-pahlu piye hue
ek hum the teri bazm mein aansu piye hue

dekha jise bhi us ki mohabbat mein mast tha
jaise tamam shahr ho daru piye hue

takrar be-sabab to na thi rind o shaiKH mein
karte bhi kya sharab the har do piye hue

phir kya ajab ki log bana len kahaniyan
kuchh main nashe mein chur tha kuchh tu piye hue

yun un labon ke mas se moattar hun jis tarah
wo nau-bahaar-e-naz tha KHushbu piye hue

yun ho agar ‘faraaz’ to taswir kya bane
ek sham us ke sath lab-e-ju piye hue

Use mujhe chod diya to kya hua Faraz
Maine bhi to choda tha sara zamana uske liye